ന്യൂഡല്ഹി: കോണ്ഗ്രസ് അധ്യക്ഷ സോണിയ ഗാന്ധിക്കെതിരെ അപകീര്ത്തിപരമായ പരാമര്ശം നടത്തിയെന്ന കേസില് പ്രമുഖ മാധ്യമപ്രവര്ത്തകനും റിപ്പബ്ളിക് ടിവി എഡിറ്റര് ഇന് ചീഫുമായ അര്ണാബ് ഗോസ്വാമിക്ക് സംരക്ഷണം നല്കി സുപ്രീംകോടതി. അറസ്റ്റ് ഉള്പ്പെടെയുള്ള നടപടികളില്നിന്നാണ് മൂന്ന് ആഴ്ചത്തേയ്ക്ക് അര്ണാബിന് സംരക്ഷണം നല്കിയിരിക്കുന്നത്.
ജസ്റ്റീസ് ഡി.വൈ. ചന്ദ്രചൂഢ് അധ്യക്ഷനായ ബെഞ്ചിന്റേതാണ് ഉത്തരവ്. അര്ണാബ് ഗോസ്വാമിക്കെതിരെ കേസെടുത്തിരിക്കുന്ന മഹാരാഷ്ട്ര, ഛത്തീസ്ഗഢ്, മധ്യപ്രദേശ്, രാജസ്ഥാന്, തെലുങ്കാന, ജമ്മു കാഷ്മീര് സര്ക്കാരുകള്ക്കും കോടതി നോട്ടീസയച്ചു. അതേസമയം നാഗ്പൂരില് രജിസ്റ്റര് ചെയ്തതും മുംബൈയിലേക്ക് മാറ്റിയതുമായ കേസില് അന്വേഷണം തുടരാമെന്നും കോടതി ഉത്തരവിട്ടു. വ്യാഴാഴ്ചയാണ് അര്ണാബ് സംരക്ഷണം ആവശ്യപ്പെട്ട് സുപ്രീംകോടതിയെ സമീപിച്ചത്.
ചാനല് ചര്ച്ചയ്ക്കിടെ സോണിയ ഗാന്ധിക്കെതിരെ നടത്തിയ പരാമര്ശങ്ങള്ക്കെതിരെയാണ് അര്ണാബിനെതിരെ കേസെടുത്തത്.