Tue. Nov 24th, 2020




ചെലോല്‍ത് ശരിയാവും, ചെലോല്‍ത് ശരിയാവൂല… കടലാസ് പൂവ് നിര്‍മിച്ചു വൈറലായ ഫായിസ് എന്ന കുട്ടിയുടെ ഈ വാചകങ്ങള്‍ സോഷ്യല്‍ മീഡിയയില്‍ വൈറലാണ്. എന്നാല്‍ മില്‍മ തങ്ങളുടെ പരസ്യത്തിനായി ഫായിസിന്‍റെ ഡയലോഗുകള്‍ ഉപയോഗിച്ചിരിക്കുകയാണ്. ഉപയോഗിച്ചത് മാത്രമല്ല, ഇപ്പോള്‍ ആ വാചകത്തിന് പ്രതിഫലം നല്‍കാനും മില്‍മ തയാറായിരിക്കുകയാണ്.

ചെലോല്‍ത് ശരിയാവും ചെലോല്‍ത് ശരിയാവൂല്ല! പക്ഷേങ്കി ചായ എല്ലാര്‍തും ശരിയാവും പാല്‍ മില്‍മ ആണെങ്കില്‍!

എന്നാണ് മലബാര്‍ മില്‍മ പരസ്യവാചകമായി എഴുതിയത്. പോസ്റ്റിന് താഴെ നിരവധി കമന്‍റുകളാണ് വന്നിരുന്നത്. അടിച്ചുമാറ്റലിന് ഒരു പരിധിയില്ലേ എന്ന ചോദ്യങ്ങളുമുയര്‍ന്നു. കടപ്പാട് പോലും പറയാതെ മലബാര്‍ മില്‍മ പരസ്യവാചകമാക്കിയത് എന്ന ആരോപണവും കമന്‍റ് രൂപത്തില്‍ വരാന്‍ തുടങ്ങി. ഇതോടെ പോസ്റ്റിന് താഴെ കമന്റുമായി ഒട്ടേറെ പേരെത്തി. ഫായിസിന്റെ വാചകവും ആശയവും പണം കൊടുത്ത് വാങ്ങണം എന്നായി ഒരു വിഭാഗം. ആ കുട്ടിക്ക് അംഗീകൃത മാനദണ്ഡങ്ങള്‍ അനുസരിച്ചുള്ള റോയല്‍റ്റി മില്‍മ കൊടുക്കണമെന്നും ഒരു സര്‍ട്ടിഫിക്കറ്റും രണ്ട് സിപ്പപ്പും ഒരു ഐസ്ക്രീമും ആയി അത് ഒതുങ്ങരുതെന്നും ആവശ്യമുയരുന്നുണ്ട്. എന്തായാലും ആത്മവിശ്വാസം പകരുന്ന വാചകങ്ങളുടെ കൂട്ടത്തില്‍ ഒരു പടി മുന്നിലാണ് ഫായിന്റെ ഈ വാക്കുകളെന്നാണ് ഉയരുന്ന പ്രതികരണം.

ഒടുവില്‍ അത് വ്യാപകമായി പ്രചരിക്കാന്‍ തുടങ്ങി. അവസാനം അത് മില്‍മ മാനേജ്മെന്‍റിന്‍റെ അടുക്കലുമെത്തി. ഫായിസിന് പ്രതിഫലം വേണമെന്ന് ആവശ്യപ്പെട്ടുള്ള ക്യാമ്ബയിന്‍ ഫലം കാണുകയും ചെയ്തു. മില്‍മ പോലെ മഹത്തായ പാരമ്ബര്യം ഉള്ള സ്ഥാപനം ക്യാപ്‌ഷന്‍ ചെയ്തതില്‍ വീട്ടുകാരും സന്തോഷത്തിലാണ്. നാളെ (ചൊവ്വ) പകല്‍ ഫായിസിനെ നേരില്‍കാണും എന്നാണ് അധികൃതര്‍ അറിയിച്ചിരിക്കുന്നത്. മാധ്യമ പ്രവര്‍ത്തകനായ കെപിഎം റിയാസാണ് ക്യാമ്ബയിന് ഇത്രയും വലിയ സ്വീകാര്യത നേടിക്കൊടുത്തത്. ഇതോടുകൂടി ആത്മവിശ്വാസത്തിന്‍റെ ഒരു പുതിയ അധ്യായമാണ് ഫായിസിലൂടെ തുറക്കപ്പെടുന്നത്.

 



By onemaly