wa.me/+9195 2629 4001
ONLINE NEWS PORTAL
Sreekandapuram

0 Comments

ഒന്‍പത് മാസത്തിനുള്ളില്‍ 10 ലക്ഷം യാത്രക്കാര്‍; കണ്ണൂര്‍ വിമാനത്താവളം ഉയരങ്ങളിലേക്ക്

കണ്ണൂര്‍: കൂടുതല്‍ ഉയരത്തിലേക്ക് പറന്നുയരുകയാണ് കണ്ണൂര്‍ അന്താരാഷ്ട്ര വിമാനത്താവളം. അഭിമാനകരമായ നേട്ടമാണ് കണ്ണൂര്‍ വിമാനത്താവളം ഇന്ന് കുറിച്ചത്. ഒന്‍പത് മാസത്തിനുള്ളില്‍ 10 ലക്ഷം യാത്രക്കാരെന്ന ഉജ്ജ്വല നേട്ടം കണ്ണൂര്‍ വിമാനത്താവളം കൈവരിച്ചത് ഉത്രാട നാളില്‍. സംസ്ഥാനത്തിന് ഏറെ അഭിമാനകരമായ നേട്ടമാണിത്.

സിംഗപ്പൂരില്‍ താമസമാക്കിയ ഒന്‍പതാം ക്ലാസ് വിദ്യാര്‍ഥിനി ദുര്‍ഗ തോട്ടെന്‍ ആണ് കണ്ണൂര്‍ വിമാനത്താവളത്തിലെ 10 ലക്ഷാമത്തെ യാത്രക്കാരി. ദുര്‍ഗ്ഗയും അച്ഛന്‍ സതീശന്‍ തൊട്ടെന്‍, അമ്മ രജനി, സഹോദരന്‍ ആദിത്യന്‍ എന്നിവര്‍ വൈകിട്ട് 4.10 ന് ഇന്‍ഡിഗോ വിമാനത്തില്‍ ആണ് കണ്ണൂരില്‍ എത്തിച്ചേര്‍ന്നത്. പയ്യന്നൂരിലുള്ള കുടുംബ വീട്ടില്‍ ഓണമുണ്ണാന്‍ എത്തിയതാണ് ഇവര്‍ നാല് പേരും.

കണ്ണൂര്‍ വിമാനത്താവളത്തില്‍ നിന്ന് കൂടുതല്‍ ആഭ്യന്തര സര്‍വ്വീസുകള്‍

എയപോര്‍ട്ട് സീനിയര്‍ ഓപ്പറേഷന്‍സ് മാനേജര്‍ രാജേഷ് പൊതുവാള്‍ ദുര്‍ഗ്ഗക്ക് സ്നേഹോപകാരം നല്‍കി. എയര്‍പോര്‍ട്ട് അഡ്‌മിനിസ്‌ട്രേഷന്‍ ആന്‍ഡ് ലാന്‍ഡ് മാനേജര്‍ അജയകുമാര്‍ എയര്‍പോര്‍ട്ട് ചീഫ് സെക്യൂരിറ്റി ഓഫീസര്‍ വേലായുധന്‍ എം.വി, ഇന്‍ഡിഗോ എയര്‍ലൈന്‍സ് എയര്‍പോര്‍ട്ട് മാനേജര്‍ ചാള്‍സ് മാത്യു എന്നിവര്‍ സന്നിഹിതരായിരുന്നു. ഇന്‍ഡിഗോ എയര്‍ലൈന്‍സിന്റെ സ്നേഹ ഉപഹാരവും കുടുംബത്തിന് സമ്മാനിച്ചു.

അന്താരാഷ്ട്ര എയര്‍ലൈന്‍സുകളുടെ വരവോടെ ഇതിലും കൂടുതല്‍ യാത്രക്കാര്‍ എത്തുമെന്ന് പ്രതീക്ഷിക്കുന്നതായി വിമാനത്താവള അധികൃതര്‍ പറഞ്ഞു. പ്രതീക്ഷിച്ചതിനേക്കാള്‍ വലിയ വിജയം സമ്മാനിച്ച യാത്രക്കാര്‍ക്ക് ഹൃദയം നിറഞ്ഞ നന്ദി രേഖപ്പെടുത്തുന്നതായും അധികൃതര്‍ കൂട്ടിച്ചേര്‍ത്തു.

പത്ത് ലക്ഷം യാത്രക്കാരായ നേട്ടം ആഘോഷിച്ചതിനൊപ്പം കണ്ണൂര്‍ വിമാനത്താവളത്തില്‍ ഇന്ന് ഓണാഘോഷ പരിപാടികളും നടന്നു. ഓണാഘോഷത്തിന്റെ ഭാഗമായി വിമാനത്താവളത്തില്‍ അത്തപ്പൂക്കള മത്സരം നടത്തി. എയര്‍പോര്‍ട്ടിലെ വിവിധ ഏജന്‍സികള്‍ തമ്മിലായിരുന്നു മത്സരം. 13 ഏജന്‍സികളാണ് മത്സരത്തില്‍ പങ്കെടുത്തത്.