National

ലൈംഗിക പീഡനകേസ്​: ജാമ്യം ലഭിക്കാന്‍ രാഖി കെട്ടണമെന്ന വിവാദ ഉത്തരവ്​ റദ്ദാക്കി സുപ്രീംകോടതി



ലൈംഗിക പീഡനകേസ്​: ജാമ്യം ലഭിക്കാന്‍ രാഖി കെട്ടണമെന്ന വിവാദ ഉത്തരവ്​ റദ്ദാക്കി സുപ്രീംകോടതി

ന്യൂഡല്‍ഹി: ലൈംഗിക പീഡനകേസില്‍ ജാമ്യം ലഭിക്കാന്‍ ഇരയായ പെണ്‍കുട്ടിയുടെ കൈയില്‍ രാഖികെട്ടണമെന്ന മധ്യപ്രദേശ്​ ഹൈകോടതിയുടെ വിവാദ ഉത്തരവ്​ റദ്ദാക്കി സുപ്രീംകോടതി. വനിത അഭിഭാഷകര്‍ നല്‍കിയ ഹരജിയിലാണ്​ സുപ്രീംകോടതി ഇടപെടല്‍. ഇത്തരം ഉത്തരവുകള്‍ പിന്നീട്​ ആവര്‍ത്തിക്കുന്നതിന്​ ഇടയാക്കുമെന്നും കോടതി നിരീക്ഷിച്ചു.

പെണ്‍കുട്ടി അനുഭവിച്ച മാനസികമായ പീഡനം പരിഗണിക്കണമെന്ന്​ വനിത അഭിഭാഷകരുടെ ആവശ്യവും കോടതി അംഗീകരിച്ചു. കേസിലെ പ്രതിക്ക്​ ജാമ്യം അനുവദിച്ച നടപടിയേയും ഹരജിയില്‍ ചോദ്യം ചെയ്​തിരുന്നു.



2020 ഏപ്രിലിലാണ്​ അയല്‍ക്കാരിയെ ലൈംഗിക പീഡനത്തിന്​ ഇരയാക്കിയെന്ന കേസില്‍ ഉജ്ജയിന്‍ സ്വദേശിയായ വിക്രം ബാഗരി​െയ അറസ്റ്റ്​ ചെയ്​തത്​. തുടര്‍ന്ന്​ ഇയാള്‍ മധ്യപ്രദേശ്​ ഹൈകോടതിയില്‍ ജാമ്യാപേക്ഷ സമര്‍പ്പിച്ചു. ജാമ്യം ലഭിക്കുന്നതിനുള്ള വ്യവസ്ഥകളിലൊന്നായി ഹൈകോടതിയുടെ ഇന്ദോര്‍ ബെഞ്ച്​ മുന്നോട്ട്​ വെച്ചത്​ പീഡനത്തിന്​ ഇരയായ പെണ്‍കുട്ടിക്ക്​ രാഖികെട്ടണമെന്നതായിരുന്നു. ഈ വ്യവസ്ഥക്കെതിരെയാണ്​ വനിത അഭിഭാഷകര്‍ സു​പ്രീംകോടതിയെ സമീപിച്ചത്​.

ഇതിന്​ പുറമേ യുവതിയുടെ സഹോദരന്​ 11,000 രൂപയും മകന്​ വസ്​ത്രങ്ങളും മധുരപലഹാരങ്ങളും വാങ്ങാന്‍ 5000 രൂപയും നല്‍കാനും കോടതി ഉത്തരവിട്ടു. ​ഒക്​ടോബര്‍ 16ന്​ മധ്യപ്രദേശ്​ ഹൈകോടതി വിധി സുപ്രീംകോടതി സ്​റ്റേ ചെയ്​തിരുന്നു.